CETMo
Camiño do Pouso, nº 2
36560 Soutelo de Montes
Concello de Forcarei
Pontevedra
Horarios
Sábados e domingos
mañás 11:00 a 13:30
tardes 17:00 a 20:00
Resto dos días: previa cita no 986 75 61 91
ou no 696 51 30 33
13 de agosto: lembranza na Ponte do Barco
5 Agosto 2010, por cetmo.
Cumprindo cunha obriga moral de lembrar aos que deron a súa vida pola liberdade, como todos os anos o día 13 de agosto acompañaremos a Rogelio Arca (que cumpríu xa os 95 anos) no 74 aniversario do asasinato por parte dos falanxistas do seu pai, Francisco Arca Valiñas, e do seu amigo Secundino Bugallo Iglesias, na Ponte do Barco (Pedre-Cerdedo). Tal e como se decidiu vai para cinco anos, “Verbo Xido” pretende que a data do 13 de agosto forme parte doutro calendario alternativo ao das enchentas dos estómagos agradecidos: o da cidadanía consciente e sensible, no que as ideas de memoria, emancipación, fraternidade e igoaldade se encarnen nas intervencións de amigos e amigas afeitos a crear sentimentos liberadores a través das palabras. Por iso, no vindeiro 13 de agosto, ás 20 horas, ao pé do humilde monumento que lembra os canteiros asasinados na Ponte do Barco, coa renovada ledicia de nos xuntar, contaremos con dous poetas ben coñecidos e benqueridos por nós, Elvira Ribeiro e Xosé Luís Santos Cabanas, comprometidos dende sempre coa “memoria dos oprimidos”. Como sabedes tamén, “Verbo Xido” aproveita estas xuntanzas para presentar algunha que outra novidade impresa. Desta volta, distribuiremos unha nova publicación titulada “As vítimas do franquismo na Terra de Montes (1936-1953). Beariz, Cerdedo e Forcarei”, da autoría de Dionísio Pereira, que tamén fará algunhas breves consideracións sobre esta temática. ¡¡Vos agardamos a todos e a todas!!
NOVOS HORIZONTES PARA O CETMO
28 Xullo 2010, por cetmo.
O Centro Etnográfico da Terra de Montes emprazado en Soutelo de Montes, Concello de Forcarei, toma un novo impulso coa recente eleción na asemblea da Asociación VERBO XIDO, realizada o pasado 3 de xullo, dun Consello de Dirección presidido por Gumersindo Guinarte Cabada. Gumersindo Guinarte Cabada, natural de Castrelo, asume así o reto decidido pola Asociación e dado a coñecer no editorial do Boletín nº 24 de VERBO XIDO (Febreiro 2010) de que “o CETMO abra novas vías de diálogo coas institución locais e aposte polo traballo en rede cunha xestión máis profesionalizada e con cometidos máis ambiciosos“. Así o manifestaba o novo presidente da entidade ao tempo que engadía “ata agora o CETMO estaba tutelado polo colectivo social VERBO XIDO que realizou un traballo extraordinario tanto na mellora e posta en valor do edificio que alberga a colección etnográfica como na promoción e difusión da cultura de Terra de Montes. O novo equipo, temos por diante un reto ilusionante pero ambicioso que esperamos levar a cabo“.
A decisión de apostar por un equipo rector para o Centro Etnográfico foi tomada na devandita asemblea da asociación VERBO XIDO na que se acordou que o Museo, que alberga máis de 800 pezas e unha importante biblioteca/arquivo, debía contar cun equipo de profesionais destacados que aporten os seus coñecementos e centren o seu traballo na posta en valor e na xestión do propio CETMO, con autonomía da asociación. Este equipo está composto por:
- Presidente: Gumersindo Guinarte Cabada, natural de Castrelo, profesor de Dereito da Universidade de Santiago, con ampla experiencia en xestión e relacións institucionais tras desempeñar cargos como secretario xeral da Universidade de Santiago, Vicevaledor do Pobo e Secretario xeral da Presidencia do goberno de Emilio Pérez Touriño.
- Vicepresidente: Alfredo González Ruibal, con orixe en Soutelo de Montes, fundador do Centro Etnográfico e impulsor do proxecto que permitíu que a colección de pezas que alí se atopa sexa unha das máis completas de Galicia. Na actualidade Alfredo González, licenciado en historia, compaxina a súa labor de investigador do CSIC con misións arqueolóxicas en Europa do Leste e Africa.
- Secretaria: Concha Otero Alonso, natural de Sanguñedo, profesora de educación secundaria en Vigo e defensora activa do medio ambiente e o desenvolvemento sostible do medio rural.
- Vogais:
Dionisio Pereira, residente en Cerdedo, historiador con recoñecidas publicacións sobre os movementos sociais en Galicia; coordinador da provincia de Pontevedra no Proxecto Interuniversitario “As Vítimas, Nomes e Voces”. Experto en cultura e patrimonio marítimo; é membro do Consello Asesor do Museo do Mar de Galicia.
Luís Gil Pita, con orixe en Cerdedo, arquitecto de profesión. Redactor de diversos inventarios de patrimonio arquitectónico e etnográfico e con experiencia en rehabilitacións e proxectos expositivos.
Beatriz García González, natural de Avila, Museóloga e Consultora cultural e directora da empresa “e-burbulla”.
Francisco Vieitez Cendón, natural de Soutelo de Montes, empresario do sector da cultura e a comunicación e asesor cultural.
Ademáis formará parte deste Consello de Dirección a persoa que desempeñe na Xunta Directiva da Asociación VERBO XIDO o cargo do tesoureiro/a.
Nos próximos días, este equipo reunirase para realizar unha proposta de traballo a medio prazo, mentres de xeito inmediato o presidente Gumersindo Guinarte centrarase en contactar coas institucións locais, tanto concellos, como colectivos para presentar este novo proxecto que segundo el mesmo manifesta “quere ante todo ser un proxecto integrador e aberto, no que contemos coa maior participación social posible e que contribúa a xerar unha oferta cultural ampla e de calidade en Terra de Montes“.
Mentres tanto, a Asociación VERBO XIDO agarda a resolución favorable da subvención solicitada ao abeiro do programa LEADER, a través do GDR 20, no que a Asociación desempeña a Secretaría na Comisión Permanente, para poder mellorar e actualizar o discurso museístico, tendo máis en conta a perspectiva de xénero, a utilización das NTIC´s e o traballo en rede con outros colectivos da comarca.
Como deciamos no noso boletín nº 24: “Veñen, pois, tempos apaixonantes para o CETMO.”
Acto conmemorativo na Illa de San Simón
23 Xullo 2010, por cetmo.
O pasado 18 de xullo a asociación Verbo Xido estivo na illa de San Simón, participando nun acto conmemorativo do 74 aniversario do comezo da Guerra Civil, para reivindicar ás víctimas do franquismo. Ademais presentouse a Iniciativa Galega pola Memoria, da que Verbo Xido e destacado impulsor e dinamizador.
No acto, que presentou Comba Campoi, actuou A Quenlla e leron poemas os profesores e escritores Claudio Rodriguez Fer e Carmen Blanco.
Continuación asemblea xeral
24 Xuño 2010, por cetmo.
Debido á cantidade e importancia dos asuntos a tratar na orde do día da Asemblea Xeral da asociación do pasado sábado 19 de xuño, quedades convocados de novo para continuar a devandita reunión o vindeiro sábado 3 de xullo, no mesmo lugar, a antiga Cámara Agraria de Cerdedo, hoxe Casa de Cultura, ás 11 horas.
Retomaremos a reunión no punto 3º da orde do día, coa elección do Consello de Dirección do CETMO.
Para participar nestas eleccións poderán presentarse as candidaturas ben a través do correo www.verboxido@yahoo.es ou no enderezo da asociación Camiño do Pouso 2, Aldea de Arriba, 36560 Soutelo de Montes, Forcarei, ata o comezo da Asemblea, ás 11 horas.
Cada candidatura comprenderá, alomenos os nomes de dúas persoas que asumirán as responsabilidades de Director/a e Vicedirector/a do CETMO e poderán ser propostas unha ou varias persoas como vogais; será membro nato deste Consello de Dirección a persoa que ocupe o posto de Tesoureiro da Asociación Verbo Xido.
De non poder asistir, podedes delegar o voso voto noutra persoa.
Lémbrovos a importancia da puntualidade así como da vosa presencia para tomar decisións en asuntos, como o CETMO, no que temos posto nos últimos tempos moito esforzo, xa que pensamos que a súa existencia e bo funcionamento é fundamental para a dinamización cultural na Terra de Montes.
Viaxe cultural de Verbo Xido e Espadela ao Courel de Novoneira
13 Xuño 2010, por cetmo.
A pasada fin de semana as Asociacións Espadela de Cerdedo e Verbo Xido de Terra de Montes realizaron conxuntamente a súa viaxe anual organizando conxuntamente unha visita ao Courel para homenaxear a Uxio Novoneira, poeta ao que se adicou este ano o Día das Letras Galegas.
O percorrido foi o que se anunciaba no programa: Seceda, Ferreiría de Seoane, Parada, Moreda, Seoane, Esperante…
Aquí vos mostramos unhas fotiños do fermoso bosque autóctono do Caurel en Seceda, do monumento levantado pola Asociación de Escritores en Língua Galega no ano 2000 e da casa de Uxío novoneira en Parada.
Pagou a pena a longa viaxe.
Convocatoria de Asemblea Xeral de Verbo Xido
7 Xuño 2010, por cetmo.
Convócase a todos os socios de Verbo Xido á Asemblea Xeral Ordinaria que se celebrará o día 19 de Xuño de 2010, ás 10:30 horas en primeira convocatoria e ás 11:30 horas en segunda en Cerdedo na Casa da Cultura (locais da antiga Cámara Agraria) para tratar a seguinte ORDE DO DIA:
Primeiro.- Presentación, lectura e aprobación, se procede, da acta da sesión anterior.
Segundo.- Situación da Xunta Directiva, e renovación de cargos se procede.
Terceiro.- Modificación dos Estatutos e, no seu caso, aprobación do regulamento de rexime interno do CETMO e nomeamento do Consello de Dirección.
Cuarto.- Tema das Xornadas Terra de Tod@s
Quinto.- Subvención do GDR
Sexto.- Pregos e inqueritos
De non poder asistir persoalmente, podes delegar a representación para esta Asemblea Xeral, sen que unha mesma persoa poda representar a máis dun asociado ou asociada.
Memoria de actividades de VERBO XIDO 2009
11 Abril 2010, por cetmo.
ACTIVIDADE REIVINDICATIVA:
- Participación na manifestación contra a ocupación de Gaza en Compostela o 18 de xaneiro de 2009.
- Denuncia da desfeita ocasionada polas obras realizadas polo Concello de Cerdedo no entorno do Roteiro Sarmiento entre Cabenca e Revolta.
- Absolución por parte da Audiencia Provincial de Pontevedra ao historiador Dionisio Pereira denunciado pola familia do alcalde falanxista de Cerdedo Gutiérrez Torres.
- Denuncia do abandono da ermida do Pegho.
- Homenaxe aos represaliados do Franquismo en Cerdedo no monolito da Ponte do Barco.
- Denuncia do uso de herbicidas na limpeza de viais e cunetas por parte do concello de Cerdedo.
ACTIVIDADE CULTURAL:
- Conferencia do profesor Manuel Reboredo sobre “O siñor Afranio e os esmolantes”.
- Exposición en Forcarei da mostra itinerante sobre “Antón Alonso Ríos, o siñor Afranio”.
- Roteiro nocturno polo Monte Seixo para ver a habitual choiva de estrelas do mes de agosto.
- Celebración da X edición das xornadas Terradetod@s sobre “Terra de Montes no audiovisual”, coa estrea mundial do documental “Monte do Seixo. A montaña máxica”, realizado polo Colectivo Etnográfico Serpe Bichoca.
- VIII Roteiro Sarmiento nos montes de Loureiro e Tomonde.
- Edición de boletíns trimestrais.
ACTIVIDADE EDITORIAL:
- Presentación do libro “Recordar doe” de Herminio Barreiro.
- Presentación do libro “Carta arqueolóxica do concello de Cerdedo” de Calros Solla.
- Presentación do libro “Cantares de Manuela de Barro”, de Calros Solla.
- Presentación do libro “Monte do Seixo. O santuario perdido dos Celtas”, de Calros Solla.
OUTRAS ACTIVIDADES:
- Participación de Verbo Xido no Grupo de Desenvolvemento Rural GDR-20 como membro de pleno dereito, desempeñando a secretaría do devandito organismo.
CETMo:
- Visita ao Cetmo dE diversos grupos.
- Obras de ampliación e rehabilitación do Centro Etnográfico de Terra de Montes, cun investimento total superior aos 50.000 €, financiado en parte cunha subvención da Axencia Galega de Desenvolvemento Rural por importe de 17.000 € e con aportacións anónimas superiores aos 18.000 €. A inauguración e presentación pública do remodelado centro celebrouse o 26 de decembro.
Verbo Xido intégrase na Federación Ecoloxista Galega
6 Abril 2010, por cetmo.
De xeito coerente coa súa traxectoria na defensa do medioambiente na Terra de Montes, a Asociación Ecoloxista e Cultural “Verbo Xido”, solicitou e foi admitida como novo integrante da “Federación Ecoloxista Galega”, na súa derradeira asemblea anual celebrada en Santiago o derradeiro 27 de marzo, data na que a FEG celebraba así mesmo o seu 20 aniversario. A FEG, o organismo de defensa medioambiental con maior prestixio e solvencia no noso país, está composta neste intre por 17 colectivos de toda Galicia, dende grupos con implantación en todo o territorio galego (ADEGA ou Verdegaia), a colectivos locais como APDR ou “Vaipolorío” de Pontevedra.
As razóns de “Verbo Xido” para solicitar a súa integración na FEG, están relacionadas coa posta en vigor dun conxunto de normativas por parte da Xunta de Galicia, caso do Plan Eólico ou da Lei do Solo, caso da implementación dunha serie de medidas por parte das Administracións central ou autonómica, que poden afectar gravemente ao futuro do medio natural e o patrimonio cultural da zona. Neste último apartado, nos estamos a referir á construcción do AVE, a concesión de licencias para a obtención de electricidade a partir da biomasa sen as debidas garantías, ou á pretensión de SOGAMA verbo da construcción doutra planta incineradora no Sur de Galicia. Coa súa entrada na FEG, “Verbo Xido” pretende procurar asesoramento e apoios externos para enfrontar todos estes posibles problemas, procurando solucións aceptables para a sostenibilidade tanto do entorno natural como das actividades que conforman ou poden conformar o medio de vida dos habitantes da nosa bisbarra.
Respecto da construcción do AVE, aproveitamos para facer pública unha breve valoración dos resultados do EIA, aprobado polo Ministerio de Medio Ambiente e publicado no BOE do 15/3/2010, que, como é sabido elixe como opción a chamada Alternativa 3, correspondente ao trazado O Carballiño Norte-Cerdedo Sur, lixeiramente modificado no que respecta ao Concello de Cerdedo en Cachofés, San Martiño e Pedre:
a) Valoramos positivamente os cambios realizados, salvando os núcleos de Cachofés e o bairro do Salgueiral en Pedre, así como un pequeno conxunto en San Martiño, algo que foi posible mercé ás alegacións que presentaron tanto o Concello de Cerdedo como a nosa Asociación, mencionados expresamente no EIA. Non obstante, a solución dista de ser satisfactoria sobre todo no caso de San Martiño e Pedre, onde resultarán afectadas terras de labor actualmente en activo co conseguinte perxuicio para os seus propietarios. Ambos núcleos, asemade, quedan moi perto das trincheiras do trazado: a 50 metros, algo que vai afectar gravemente a habitabilidade de tais núcleos.
b) Facemos un chamamento ao Ministerio de Fomento, promotor do proxecto, e á Xunta de Galicia para que amosen unha maior transparencia, facendo públicos sen agardar ao proxecto constructivo os emprazamentos dos 48 verquedoiros previstos no devandito trazado (en especial aqueles que afecten aos LIC Serra do Cando e Lérez), algo fundamental habida conta do volume de movemento de terras considerado, así como das instalacións auxiliares previstas no entorno dos viaductos e tuneis. Só así poderemos ter unha opinión fundada dos efectos das obras no medio, na paisaxe e nas explotacións agrarias e forestais.
c) Queremos amosar a nosa preocupación por que no tramo comprendido entre Cerdedo-San Martiño-Pedre, ademais dalgún verquedoiro e senllas instalacións auxiliares, se contemple un PAET (Puesto de Adelantamiento y Estacionamiento de Trenes), utilizado para operacións ferroviarias, un edificio técnico e unha subestación eléctrica, con todo o que implica de maior ocupación dos terreos, un grande volume de desmonte de terras (caseque dous millóns de metros cúbicos de verquedoiro) e impacto medioambiental e visual.
d) Queremos lembrar que no seu día (Outubro de 2007) a Deputación de Pontevedra e o Sr. Alcalde de Cerdedo rexeitaron a opción agora elixida, argumentando a afectación de vivendas (agora corrixida), o maior movemento de terras e unha reducción de tempos de viaxe. A iso temos que engadir, que o propio EIA sinala que as opcións 2 e 4 (as que transcurren por Cerdedo Norte) son opcións menos agresivas medioambientalmente. En consecuencia, pensamos que a alternativa 3, a elixida no EIA, segue a ser a máis perxudicial para o Concello de Cerdedo malia as modificacións anteditas. E agardamos unha valoración do Concello ao respecto.
e) Por último, reafirmamos a nosa oposición non só a este trazado do AVE por Cerdedo, senón que rexeitamos a pertinencia deste tipo de transporte no territorio de Galicia, xa que supón un altísimo custo económico e medioambiental, para conseguir unha mínima rendibilidade social.
Acta da asemblea xeral ordinaria de Verbo Xido
15 Marzo 2010, por cetmo.
O sábado 13 de marzo, celebrouse dita asemblea na Casa de Cultura de Cerdedo e, ademais de aprobarse a xestión e orzamento do ano 2009, acordouse:
1º Continuar desenvolvendo a mellora e dinamización do Centro Etnográfico de Terra de Montes cos medios propios e solicitando a colaboración de organismos da administración (Concello de Forcarei, Deputación, AGADER…)
Neste punto valorouse moito a xenerosa aportación de todas aquelas persoas, socias ou non, que coas súas achegas permitiron que partindo dunha subvención de 17.000€, concedida por AGADER, chegárase a investir no CETMO preto de 55.000€, o dobre do orzamentado inicialmente.
2º Solicitar a entrada na Federación Ecoloxista Galega FEG.
3º Desenvolver as seguintes actividades:
- Impulsar a publicación dun libro sobre os canteiros de Terra de Montes e a súa fala, realizado por Carlos Solla e a realización posterior dun acto con presencia dos protagonistas .
- Colaborar na publicación do libro que sobre as bandas de música en Cerdedo escribíu o tamén cerdedense Manolo Campos.
- Institucionalizar a celebración dun SERÁN no mes de xaneiro-febreiro, despois do éxito acadado este ano co realizado por esas datas en Soutelo de Montes.
- Lembrar en agosto de 2010 aos asesinados o 13 de agosto do 36, na Ponte do Barco, cun acto poético a cargo de Elvira Riveiro e Xose Lois Santos Cabanas.
- Asinar un convenio de colaboración coa Asociación de mulleres Espadela de Cerdedo para conseguir unha maior presenza da muller na exposición fotográfica que acolle o CETMO.
- Realizar un intercambio de actividades coa Asociación Canón de Pau de Cotobade,visitando o percorrido do Foxo do Lobo, recén recuperado pola devandita asociación.
- Celebrar conxuntamente coa Asociación de mulleres Espadela o Día das Letras galegas, o 17 de maio, visitando nesas datas a terra de Uxío Novoneira,O Caurel.