11:00 horas en primeira convocatoria e 12:00 horas en segunda.

Casa da Cultura de Cerdedo  (local da antiga Cámara Agraria).

ORDE DO DIA:

Primeiro.- Presentación e aprobación da acta da sesión anterior.

Segundo.- Presentación e aprobación das contas  correspondentes ó ano 2009.

Terceiro.- Aprobación ou censura da xestión da Asociación durante o ano 2009

Cuarto.- Situación das obras do  CETMO financiación das mesmas. Proxectos para a súa explotación, coa posibilidade de firmar convenios coas administracións públicas.

 Quinto.-   Actividades e orzamento para o ano 2.010. Autorización para a solicitude de subvencións.

Sexto.- Integración da asociación en outras entidades ou agrupacións de entidades sen ánimo de lucro. 

Séptimo.- Pregos e inquéritos

Aqueles socios que non poideran asistir persoalmente poden delegar a representación para esta Asemblea Xeral, sen que unha mesma persoa poida representar a mais de un asociado.

Animamos a todos os amigos a acudir neste momento de gran trascendencia dado o recente remate das obras de rehabilitación do Cetmo e a necesidade de darlle unha maior proxección e utilidade social a un activo tan importante como contamos na asociación.

Precisamos de todas as vosas ideas para facer do Cetmo un museo vivo e potenciar a súa función divulgadora.

Vémonos o día 13 en Cerdedo.

Por décimo ano consecutivo celebramos a Festa da Vincha en Cerdedo, rendendo una homenaxe á tradición gastronómica máis popular do Entroido nestas terras do interior de Galicia.

A festa da vincha é un proxecto da Asociación de Mulleres “Espadela” que edición tras edición  converteuse na actualidade nun dos eventos sociais e culturais máis salientábeis do municipio, e por mérito propio a festa gastronómica máis antiga, enxebre e tradicional do Concello.

As mulleres de Espadela desexamos manter viva a elaboración tradicional deste dóce propio do  Entroido, disfrutando da xuntanza entre os veciños e veciñas dos arredores e os numerosos visitantes.

A nosa oferta coma sempre é variada: música, oficios tradicionais, concurso de vinchas, conta contos e, por suposto, un bo xantar con productos da época. De xeito especial agradecemos a colaboración de todas as socias, veciños e veciñas, así coma dos concellos de Cerdedo e Pontevedra e demais entidades que fan posible a festa da Vincha

Asociación de mulleres Espadela

Programa

12.30 h.- Lectura do pregón a cargo de Mariluz Montes Quireza

 A partir das 13.00 h.-

 Concurso de vinchas e de doces de antroido

 Obradoiro de chocolate para nenas e nenos (3,50€, de 13.00 a 13:45h)

 Xantar: Polbo, churrasco e lacón con grelos a prezos populares

 19.00 h.- Teatro: “Se o sei non volvo á casa” (Asociación Vintureira de Parada, Campo Lameiro)

 Durante todo o día.-

Música: Os Chichisos e Os Abrentes de Cerdedo

Exposición fotográfica “Dez anos de Espadela”.

Obradoiros de oficios artesanais

Venda de produtos artesáns e ecolóxicos

Proxección da curtrametraxe Mamásunción  de Chano Piñeiro

O pasado sábado 23 de Xaneiro, Verbo Xido celebrou unha Ruada solidaria para recadar fondos cos que contribuir a sufragar a rehabilitación do Centro Etnográfico de Terra de Montes.

Recomendamos a quen lle guste viaxar que se faga cun exemplar. Paga a pena!!

Tratouse dun sinxelo acto que contou coa presenza do alcalde de Forcarei e o anterior director xeral de Cultura da Xunta de Galizate, aos que se lles dirixíu unhas verbas de agradecemento pola súa colaboración neste proxecto ao augardente; tras o cal se servíu un pequeno ágape servido polo colectivo A Hortiña da Ponte, todo ilo amenizado pola música dos Terribles de Castrodiz.

Como sabedes, no mes de agosto comezaron as obras de rehabilitación e mellora do CETMO, que se atopaba nunha situación de franco deterioro tal e como se puido comprobar ao inicio dos traballos. Unha vez conseguida unha subvención de 17.000 €   concedida por AGADER, emprendimos as obras orzamentadas en algo máis de 30.000 €, que agora, por necesidades e melloras que foron xurdindo polos imprevistos lóxicos dunha restauración, necesitamos ampliar.

   O CETMO está quedando moi ben, totalmente remozado e revalorizado, como podedes comprobar   na asemblea coas fotos que imos amosar, así como coa visita posterior que podemos facer coas persoas interesadas.

  En consecuencia, vos animamos a asistir e a colaborar neste pulo final que precisa o CETMO.  Poden asistir con voz pero sen voto todas aquelas persoas interesadas en colaborar coa mellora do CETMO.
Facemos un chamento para que acuda o máximo posible de xente xa que a situación o require neste intre en que entre todos e todas podemos darlle unha proxección de futuro ao único centro etnográfico que existe na nosa bisbarra de Terra de Montes.
Lembramos o nº de conta onde podedes facer aportacións para este fin 2080 0444 92 0040106374

Son moitas as ocasións en que desde Verbo Xido nos temos referido á Montaña Máxica do noso bardo particular; máis nesta ocasión fómonos ata a outra beira do concello, cambiando o val do Lérez polo non menos fermoso val de Castro-Quireza.

Alí nos fomos a mañán do pasado día 11 a disfrutar dunha saudable xornada de sendeirismo baixo un sol que algúns xa dabamos por esquecido ata a vindeira primaveira. Partindo de Cuiña, un grupo de amigos de Verbo Xido enfilamos o camiño cara esta montaña de algo máis de 700 mts. de altura, disfrutando polo camiño da vista dunha inmensa variedade de flora e, en menor medida, da típica fauna local. Na primeira etapa do camiño xa levamos a primeira sorpresa, atopando un antigo “menhir” chantado hai centos de anos para delimitar os territorios de Cerdedo e Campolameiro. Non imos aventurar xa posibles orixes prehistóricos, máis haberá que indagar sobre o asunto.

Pasaba da 1 da tarde cando os nosos cansados pés deron cos nosos corpos no alto do monte para permitirnos o regalo da vista simultánea das rías de Pontevedra e Arousa, bastando con volver a vista cara os lados para disfrutar da inmensa beleza orográfica de prácticamente toda a provincia de Pontevedra e mesmo parte da de Coruña.

As 5 da tarde volviamos cansos pero amplamente satisfeitos das fermosas vistas disfrutadas baixo un sol primaveral, lembrando xa con morriña o xantar campestre disfrutado mesmo no alto do monte, corpo a terra como corresponde nestas ocasións.

Estamos xa ansiosos por voltar o vindeiro ano. E vós non faltedes. Paga a pena.

amanheceu raso na Ponte do Barco,

no antigo quilómetro 74 da estrada de Ourense.

amanheceu, e un bando-paxaro de luz

encandeou a longa noite de Pedre.

bailou o sol coma nun sanxoán adoecido

e no efémero intre do feitizo,

unha arca ateigada de bugalhos baleirara na valinha

a súa carga atómica.

a vaga expansiva abuxardou os muros das igrexas,

os xugos tornáronse torques de ouro tribo

e as frechas, ferróns hipodérmicos cos que chuzar

nas nádegas pensantes.

.

amanheceu surado na Ponte do Barco,

no antigo quilómetro 74 da estrada de Ourense.

amanheceu, e o ceo derrafado en po de auga

axinha deveu en mesto dioivo.

foi tamanha a chea que o maino río da memoria

asobordou os peitorís do esquecemento;

tamanha a enxurrada, que a frouma xunta,

monte a monte,

atinxiu a rebolos o esteiro, a badía e mar aberto.

xa fica expedita a ribeira,

xa fican mondas as veigas…

agrome, daquela, vizosa a semente

na revolta do antigo quilómetro 74;

douren louzás as centeeiras,

moian lixeiros os muínhos, cozan fartas as tafonas,

que a enfornada de hoxe

ha saciar tanta fame coma inxustiza coubo nas tripas.

. (Incluído en Pan prós crocodilos, 2009)

O señor Roxerio Arca, memoria viva da represión, flanqueado por dous amigos, durante o acto de homenaxe aos mártires cerdedenses (Pedre, 13 de agosto de 2009)

A continuación, mostramos un par de enlaces para ilustrarvos con historias da da Guerra Civil en Terra de Montes. Agardamos que sexan do voso interese:

http://oembigodobecho.blogspot.com/2009/08/uhp-conto-calado.html

http://www.farodevigo.es/portada-deza-tabeiros-montes/2009/09/08/lembranza-jose-maria-taberneiro-o-rolo-vilapouca/365957.html

O 5 de agosto de 2009, a Asociación VERBO XIDO puxo a “segunda pedra” dunha das súas máis acariñadas iniciativas, a mellora integral do edificio do CETMo. O vello inmóbel, localizado no camiño do Pouso nº 2, na aldea de Soutelo (Forcarei), gorece a máis completa colección etnográfica da bisbarra. Aínda así, só o esforzo altruísta de Verbo Xido, especialmente a porfía de Lola Varela, secretaria do GDR 20, propiciou esta morna alborada nunha terra sumida nas tebras do neofeudalismo.

UNHA NOVA XEIRA PARA O CETMO (Soutelo de Montes )

        No mes de agosto comezaron as obras que permitirán realizar no Centro Etnográfico de Terra de Montes (CETMO) as reformas necesarias para solicitar a catalogación de colección visitable, a conceder pola Dirección Xeral de Patrimonio da Xunta de Galicia.

      A subvención concedida por AGADER para estas melloras non é suficiente e polo tanto pedimos a colaboración de todas aquelas persoas interesadas en darlle unha nova vida ao CETMO, único Centro Etnográfico da bisbarra.

     Co remate das obras queremos crear co apoio de veciños e entidades a “Fundación Terra de Montes”, co seu correspondente Padroado para xestionar o futuro do CETMO e as súas actividades.

     Se así o decides, podes colaborar na nova andaina do CETMO facendo unha  aportación na C/C. aberta para esta finalidade : 2080 0444 92 0040106374. Grazas.