Fermoso día na III subida ao Monte Conla.

13 Outubro 2009, por cetmo.

A Terra de Montes atópase limitada, nun dos seus tramos, por dúas maxestuosas montañas sobre as que se pousa o ceo nas mañanciñas de neboeiro. Son o Seixo e a Conla, milenaria parella de feito que encerra entre os seus picos a fertilidade vexetal e antropolóxica do Concello de Cerdedo.

Son moitas as ocasións en que desde Verbo Xido nos temos referido á Montaña Máxica do noso bardo particular; máis nesta ocasión fómonos ata a outra beira do concello, cambiando o val do Lérez polo non menos fermoso val de Castro-Quireza.

Alí nos fomos a mañán do pasado día 11 a disfrutar dunha saudable xornada de sendeirismo baixo un sol que algúns xa dabamos por esquecido ata a vindeira primaveira. Partindo de Cuiña, un grupo de amigos de Verbo Xido enfilamos o camiño cara esta montaña de algo máis de 700 mts. de altura, disfrutando polo camiño da vista dunha inmensa variedade de flora e, en menor medida, da típica fauna local. Na primeira etapa do camiño xa levamos a primeira sorpresa, atopando un antigo “menhir” chantado hai centos de anos para delimitar os territorios de Cerdedo e Campolameiro. Non imos aventurar xa posibles orixes prehistóricos, máis haberá que indagar sobre o asunto.

Menhir 

Pasaba da 1 da tarde cando os nosos cansados pés deron cos nosos corpos no alto do monte para permitirnos o regalo da vista simultánea das rías de Pontevedra e Arousa, bastando con volver a vista cara os lados para disfrutar da inmensa beleza orográfica de prácticamente toda a provincia de Pontevedra e mesmo parte da de Coruña.

Cima Conla

As 5 da tarde volviamos cansos pero amplamente satisfeitos das fermosas vistas disfrutadas baixo un sol primaveral, lembrando xa con morriña o xantar campestre disfrutado mesmo no alto do monte, corpo a terra como corresponde nestas ocasións.

Estamos xa ansiosos por voltar o vindeiro ano. E vós non faltedes. Paga a pena.

Laxe cortada

Novas 0 comentarios